Sólskinsdeild 18.02.2010

Heil og sæl. 

Vikan hér á Sólskinsdeild hefur verið viðburðarík að vanda. Mikil spenna hefur verið í kringum „dagana 3“, þ.e. bolludag, sprengidag og öskudag. Á bolludaginn fengum við fiskibollur í hádegismat og brauðbollur í kaffitímanum en einnig höfðu börnin búið til bolluvendi í síðustu viku sem þau notuðu, að eigin sögn,  til að bolla foreldra sína, systkini og jafnvel gæludýr að morgni bolludagsins. Á sprengidag var saltkjöt í matinn og borðuðu allir þangað til þeir voru „sprungnir“. Að vanda stendur þó öskudagurinn upp úr hjá okkur hér í leikskólanum og var hann haldinn hátíðlegur með pompi og prakt hér í Grænuborg eins og venja er. Allir á Sólskinsdeild mættu í frábærum furðufötum og hvert og eitt barn mjög stolt af sínum búningi J Hér voru á kreiki ýmsar furðuverur, s.s. nornir, Spiderman, sjóræningjar, Skellibjöllur, prinsessur, kettir, Svarthöfði, ninjur, o.fl. Allir sem vildu fengu andlitsmálningu áður en haldið var á ball í salnum. Þar var poppið slegið úr tunnunni og svo borðað með bestu lyst. Síðan var mikið dansað og allir skemmtu sér konunglega J

Tónlist var á sínum stað á mánudaginn og skoðuðu allir hóparnir myndbönd af afrískri tónlist og dönsum, japanskri tónlist og írskri tónlist og dönsum. Við prófuðum ýmis konar hljóðfæri, spiluðum svo á þau með tónlistinni og sumir bjuggu til afríska hlómsveit. Einnig prófuðum við að dansa við tónlistina og höfðu börnin sérstaklega gaman af að dansa hressilega við írsku tónlistina J

Elstu barna verkefnin og hreyfistundir hafa verið í fríi í vikunni, vegna veikinda starfsfólks, en frjálsi leikurinn hefur verið þeim mun meiri þessa vikuna, bæði inni og úti. Við höfum mikið verið úti að leika okkur í góða veðrinu og þar sem sólin hefur heldur betur hækkað á lofti síðustu daga hafa börnin mikið rætt um sumarið, spurt hvor vorið sé komið og hvort við förum ekki bráðum að geta leikið okkur úti á nærbuxunum sullandi í vatni =) Kannski smá bið í það... ;)

 

Kveðja frá okkur öllum á Sólskinsdeild

 

 


Foreldravefur